Seid der Budin die Ugraine ongegriffn hot, gibbds in der ganzn Rebbubligg so gut wie kaane Öfn mehr, die ma mit Hulz schürn konn.
Die Ofnbauer wern grod zugschüdd mit Aufdräch vo Leit, die die Husn vull ham, dass se im Winder in der koldn Budn hoggn müssn. Die wolln aweng a zusätzlichs Öfala für dahaam hom. „Die Nochfroch is eggsblodierd, seid der Griech losganga is“, socht a Schbrecher vom Zendrolverbond Sanidär Heizung Klima (ZVSHK) in Sangd Augusdin.
Wall alles deirer worn is und vor allm die Kostn für Gas und Öl naufgschoss sin , ham die Leit Angst, dass ihna im nächstn Winder scho die Heizung kold bleim könnerd und dass sie am Sofa friern müssn. Der Verbondsschrecher socht: „Die Leit wissn fei nimmer, wos sie machn solln.“ Obba des große Brobblem is: Selbst wenn aaner eddsaddla a Öfala bestelld hot, konn des fei bassiern, dass der aane odda annere middm Ofnrohr ins Gebirch schaua werd und sein Ofn net vorm End vom Winder griechd. Wenn überhaubd. Aggduell, socht der Verbond, muss ma mehr wie a Johr auf an Ofn waddn.
Und: Die Leit wolln ja net bluß bei uns an Ofn hom. Des is in ganz Euroba so. Und damit der Spaß glei ganz a Loch hot: Des Hulz kost inzwischn aa gscheit vill mehr.
