Fast jeder will jetzt einen Ofen haben. Christl Schemm hat diese Nachricht aus dem Hochdeutschen in den Sechsämterland-Dialekt übertragen, wie er in weiten Teilen des Landkreises Wunsiedel gesprochen wird.
Waal in da Ukraine Kröich is, sen in ganz Deitschland Kamin- und Hulzüafm Mangelware worn. Uafmbauer und Installateure kinna se kaam rettn, waal sich die Leit Sorng machn und sua vül Üafm bstölln. Die Leit wolln nu a annere Möglichkeit zan Aaschürn in ihrn Haus oder ihra Wohnung hom. „Wöi da Kröich aasbrochn is, is die Naoufraouch explodiert“, sagt a Sprecher van Zentralverband Sanitär Heizung Klima (ZVSHK) in Sankt Augustin.
Da Grund dafür is offensichtli oinerseits, daass die Preise fürs Gas und fürs Heizial oich oagstieng sen und annererseits die Angst, daass die Heizung im nächsten Winter kolt bleim kaannt. „Die Menschn fühln se nimmer sicher oder hom suagaouer Angst“, hoißt’s beim Verband. A paar Kundn wern ihrn Uafm ower wuhl nimmer kröing, bevor da nächste Winter aas is. Manche Leit möin laut ZVSHK a Gaouher wartn. In ganz Deitschland git’s ungefähr 2000 Betriebe, waoun Üafm baua.
Döi Naoufraouch is ower niat blaouß in Deitschland sua haouch. „Die Aaslastung zöiht se üwers ganze Bundesgebiet, suagaouer üwer ganz Europa. Des wiss ma, waal ma mit Kollegn in ganz Europa rian“, haout’s ghoißn. Ower seit Oafang va dean Gaouher is aa as Hulz teirer worn.
